दुष्काळी शुभेच्छा --नंद चतुर्वेदी
अनुवाद लीना मेहेंदळे -- (अंतर्नाद मासिकांत प्रकाशित)
सापडलेले झुंडभर लोक
दीर्घायु असोत,
सुखाच्या छोट्याश्या स्वप्नासाठी
आसुसलेले लोक
दीर्घायु असोत,
आश्वासनांच्या फैरीवर फैरी
झाडणारे वक्तागण
दीर्घायु असोत,
या शुष्क उजाड जमिनीत
सरकारी जाहिरातींसाठी
वसंत-गीत गाणारे
कवि - पुत्र
दीर्घायु असोत,
जोडे झिजवत सरकार-दरबारच्या बाबूंची
अजिजी करणारे
बेकार युवक
दीर्घायु असोत,
पाण्याने तळ-गाठल्या विहिरींवर
लोटीभर पाण्यासाठी
झोंबाझोंबी करणा-या
कुलस्त्रिया
दीर्घायु असोत,
घासलेटची वाट पहात
रिकामे डबे घेऊन
क्यू मधे पुढे जाण्यासाठी
धडपडते पेन्शनर
दीर्घायु असोत,
जराशा संकटात
देवावर भार टाकून
खाटल्यावर पडणारे
भक्तजन
दीर्घायु असोत,
दीर्घायु असोत,
कृतिशून्यतेने भरलेले
बांडगूळ बुद्धिजीवी
दीर्घायु असोत,
दीर्घायु असोत,
खोपडीकांडांत मेलेल्या पोटी
अनुदान घेणारे परजीवी
दीर्घायु असोत,
दीर्घायु असोत,
आमच्या दुष्काळावर
राजनीती करणारे
देशभक्त
दीर्घायु असोत,
हरेक प्रसंगी आमच्या
दुबळेपणाचीच शुभेच्छा ठेवणारे
आमचे बडबोले
दंतहीन, साठीपलीकडील नेतागण
दीर्घायु असोत,
ृृृृृृृृृृृृृृृृृृृृृृृृृृृृृृृृृृृृृृृृृृृृ
No comments:
Post a Comment